ممبئي (م ڊ) ڀارت جو خلائي مشن چندريان ٿري ڪاميابي سان چنڊ تي پهچي ويو، مشن جي ڪاميابي بعد ڀارت چنڊ تي سافٽ لينڊنگ ڪرڻ وارو دنيا جو چوٿون ۽ ايشيا جو ٻيو ملڪ بڻجي ويو آهي. پرڏيهي ميڊيا موجب ٻن ناڪامين بعد ڀارت جو ٽيون خلائي مشن چنڊ تي لهڻ ۾ ڪامياب ٿي ويو آهي. ڀارت طرفان چندريان ٿري چنڊ جي سفر تي 14 جولاءِ تي روانو ٿيو هو. چنڊ تي لينڊنگ جا منظر ڏسڻ ۽ اداري جو حوصلو وڌائڻ لاءِ اعليٰ عملدار به موجود هئا، مشن چنڊ تي ڪاميابيءَ سان لينڊ ڪرڻ بعد سڀني تاڙيون وڄائي جشن ملهايو ۽ خلائي اداري اسرو کي ٽيم کي واڌايون ڏنيون. ملڪ ۾ تاريخ منظر اسرو جي ويب سائٽ سڌيءَ ريت نشر ڪئي وئي، اسڪولن، ميدانن ۽ بازران ۾ اسڪرينون لڳائي هزارين ماڻهن چنڊ تي لهڻ وارا منظر ڏٺا. ڀارتي وزيراعظم نريندر مودي ڏکڻ آفريڪا ۾ هلندڙ برڪس سربراهي اجلاس ۾ شريڪ آهي پر هو آن لائن تقريب ۾ شريڪ ٿيو.
ڀارت جو خلائي مشن چندريان ٿري ڪاميابي سان چنڊ تي پهچي ويو
